ਸੰਗਰੂਰ ’ਚ ETT 5994 ਬੇਰੁਜ਼ਗਾਰਾਂ ਵੱਲੋਂ ਧਰਨਾ: ਪੁਲਿਸ ਵੱਲੋਂ ਧਰਨਾ ਲਗਾਉਣ ਤੋਂ ਪਹਿਲਾਂ ਹੀ ਕਾਬੂ, ਹਲਾਤ ਤਣਾਅਪੂਰਨ
ਸੰਗਰੂਰ, 29 ਜੂਨ 2025
ETT 5994 ਬੇਰੁਜ਼ਗਾਰ ਅਧਿਆਪਕਾਂ ਵੱਲੋਂ ਸੰਗਰੂਰ ਵਿਖੇ ਆਪਣੀਆਂ ਭਰਤੀ ਦੀਆਂ ਮੰਗਾਂ ਨੂੰ ਲੈ ਕੇ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਕੋਠੀ ਦੇ ਬਾਹਰ ਧਰਨਾ ਦੇਣ ਦੀ ਯੋਜਨਾ ਬਣਾਈ ਗਈ ਸੀ। ਧਰਨਾ ਲਗਣ ਤੋਂ ਪਹਿਲਾਂ ਹੀ, ਜਿਵੇਂ ਹੀ ਅਧਿਆਪਕ ਕੇਡਰ ਇਕੱਠਾ ਹੋਣਾ ਸ਼ੁਰੂ ਹੋਇਆ, ਪੁਲਿਸ ਪ੍ਰਸ਼ਾਸਨ ਨੇ ਤੁਰੰਤ ਕਾਰਵਾਈ ਕਰਦੇ ਹੋਏ ਬੇਰੁਜ਼ਗਾਰ ਅਧਿਆਪਕਾਂ ਨੂੰ ਵੇਰਕਾ ਮਿਲਕ ਪਲਾਂਟ ਤੋਂ ਕਾਬੂ ਵਿੱਚ ਲੈ ਲਿਆ।
ਯੂਨੀਅਨ ਆਗੂਆਂ ਨੇ ਦੱਸਿਆ ਕਿ ਅਜੇ ਤਕ ਉਹ ਧਰਨੇ ਦੀ ਤਿਆਰੀ ਕਰ ਰਹੇ ਸਨ ਅਤੇ ਅੱਗੇ ਕੋਠੀ ਵੱਲ ਕੂਚ ਕਰਨਾ ਸੀ, ਪਰ ਸਰਕਾਰ ਨੇ ਬੇਰੁਜ਼ਗਾਰਾਂ ਦੀ ਸ਼ਕਤੀ ਤੋਂ ਡਰਦੇ ਹੋਏ ਉਨ੍ਹਾਂ ਨੂੰ ਧਰਨਾ ਸ਼ੁਰੂ ਕਰਨ ਤੋਂ ਪਹਿਲਾਂ ਹੀ ਪੁਲਿਸ ਰਾਹੀਂ ਰੋਕ ਲਿਆ। ਇਸ ਦੌਰਾਨ ਖਿੱਚ-ਧੂਹ ਅਤੇ ਧੱਕਾ-ਮੁੱਕੀ ਵਿੱਚ ਕਈ ਅਧਿਆਪਕਾਂ ਨੂੰ ਸੱਟਾਂ ਵੀ ਲੱਗੀਆਂ।
ਯੂਨੀਅਨ ਆਗੂਆਂ ਨੇ ਸਰਕਾਰ ਨੂੰ ਚਿਤਾਵਨੀ ਦਿੱਤੀ ਕਿ ਜੇਕਰ ਬੇਗੁਨਾਹ ਸਾਥੀਆਂ ਨੂੰ ਜਲਦੀ ਰਿਹਾ ਨਹੀਂ ਕੀਤਾ ਗਿਆ ਅਤੇ ਭਰਤੀ ਦੀ ਮੰਗ ਨਹੀਂ ਮੰਨੀ ਗਈ, ਤਾਂ ਅਸੀਂ ਕਿਸੇ ਵੀ ਹੱਦ ਤੱਕ ਜਾਣ ਨੂੰ ਤਿਆਰ ਹਾਂ। ਉਨ੍ਹਾਂ ਕਿਹਾ ਕਿ ਇਹ ਹੁਣ ਆਰ ਜਾਂ ਪਾਰ ਦੀ ਲੜਾਈ ਬਣ ਚੁੱਕੀ ਹੈ।
ਇਸ ਸਾਰੇ ਤਣਾਅਪੂਰਨ ਮਾਹੌਲ ਦੌਰਾਨ, 5994 ਦੇ 3 ਬੇਰੁਜ਼ਗਾਰ ਅਧਿਆਪਕ ਭਾਵੁਕ ਹੋ ਕੇ ਬਬਲਪੁਰ ਪਾਵਰਗਰਿੱਡ ਉੱਤੇ ਚੜ੍ਹ ਗਏ। ਇਸ ਤੋਂ ਇਲਾਵਾ, ਇਕ ਹੋਰ ਸਾਥੀ ਜਸਵਿੰਦਰ ਨੇ ਜਜ਼ਬਾਤੀ ਹੋ ਕੇ ਨੇਹਰ ’ਚ ਛਾਲ ਮਾਰ ਦਿੱਤੀ। ਸਥਿਤੀ ਗੰਭੀਰ ਹੋਣ ਕਾਰਨ, ਰੋਡ ਜਾਮ ਲਗਭਗ 2 ਘੰਟੇ ਤਕ ਰਿਹਾ। ਅਖੀਰ ਵਿੱਚ ਪੁਲਿਸ ਨੇ ਅਧਿਆਪਕਾਂ ਨੂੰ ਜਬਰਦਸਤੀ ਹਟਾਇਆ।
👉 ETT ਬੇਰੁਜ਼ਗਾਰ ਅਧਿਆਪਕਾਂ ਦੀ ਭਰਤੀ ਬਹੁਤ ਸਮੇਂ ਤੋਂ ਲਟਕ ਰਹੀ ਹੈ। ਮਜ਼ਦੂਰੀ ਦੀ ਉਮੀਦ ’ਚ ਬੈਠੇ ਇਹ ਨੌਜਵਾਨ ਹੁਣ ਸਰਕਾਰ ਦੇ ਵਾਅਦਿਆਂ ’ਤੇ ਕਾਰਵਾਈ ਦੀ ਉਡੀਕ ਕਰ ਰਹੇ ਹਨ।